Tata Steel Chess-2025. Ikki Nodirbekda g'alaba, Abdusattorov yana peshqadam bo'lib oldi

Nufuzli turnirning "Masters" guruhida Nodirbek Abdusattorov, "CHellenjer"ida esa Nodirbek Yakubboev sovrinli o'rinlar uchun bahs olib boryapti. Kecha o'tkazilgan beshinchi tur bahsida Abdusattorov qora donalarda o'ynashiga qaramay, mezbonlar vakili Yorden Van Forestni mag'lubiyatga uchratdi. Nodirbek 3 g'alaba va 2 durang bilan 4 ochko jamg'argan holda yana qo'shimcha ko'rsatkichlarga ko'ra peshqadamga aylanib oldi. 

Birinchi turda Abdusattorov bilan durang o'ynaganidan keyin ketma-ket uchta partiyada g'alaba qozongan hindistonlik Rameshbabu Pragnanandha kecha ochko yo'qotdi. U yana bir niderlandiyalik grossmeyster Maks Varmerdam bilan murosaga keldi. Rameshbabu 4 ochko bilan qo'shimcha ko'rsatkichlarga ko'ra 2-o'ringa joylashgan. Amerikalik Fabiano Karuana biroz kutilmaganda Vladimir Fedoseevga imkoniyatni boy berib qo'ydi. Hindistonlik Gukesh Dommaradju germaniyalik Vinsent Keymerdan ustun keldi. 

Quvonarlisi, "CHellenjer" guruhida qatnashayotgan Nodirbek Yakubboev ham nihoyat 5-turda g'alabaga erishdi. U qora donalarda o'ynashiga qaramay, ozarbayjonlik Aydin Suleymanlini mag'lubiyatga uchratib, ochkolarini 2,5 taga etkazib oldi. Yakubboev qo'shimcha ko'rsatkichlar bo'yicha 10-pog'onadan 8-o'ringa ko'tarildi. Niderlandiyalik Ervin L`ami 4 ochko bilan yakka peshqadam bo'lib olgan.