Tokio "Katta Dubulg'a" turnirini medalsiz yakunladik

Ayni daqiqalarda musobaqaning ikkkinchi kungi saralash bahslari o'z yakuni sari yaqinlashyapti. Bugun terma jamoamizning 3 nafar vakili medallar hamda qimmatli reyting ochkolari uchun tatamiga chiqdi. Afsuski, bugun ham kechagi kun singari medal bo'lmadi. 

-60 kg vazn toifasida kurashgan Dilshodbek Baratov o'z ishtirokini to'g'ridan-to'g'ri ikkinchi bosqichdan boshladi hamda mo'g'ulistonlik Tsogt-Ochir Byambayavga yutqazib qo'ydi. 

-66 kg vazndagi tajribali dzyudochimiz Sardor Nurillaev birinchi davrada filippinlik SHugen Nakanodan ustun keldi. Ammo keyingi bosqichda mo'g'ulistonlik Erxembayar Battogtohga imkoniyatni boy berdi. 

+100 kg vazn toifasidagi sovrindor dzyudochimiz Alisher Yusupov ham to'g'ridan-to'g'ri ikkinchi bosqichdan bahslarga qo'shildi. Koreyalik Jaegu Yunni mag'lubiyatga uchratgan Yusupov chorak finalga yo'llanma beradigan bellashuvda ikki karra Olimpiada va jahon chempioni, chexiyalik nomdor Lukash Krpalekdan engildi. 

SHu tariqa, O'zbekiston terma jamoasi dzyudo vatanida o'tkazilayotgan va dunyoning nomdor sportchilari jam bo'lgan yilning so'nggi "Katta Dubulg'a" turniridagi ishtirokini medalsiz yakunladi. Ayni shu daqiqalarda terma jamoamiz bittadan beshinchi va ettinchi o'rinlar bilan 15-pog'onadan joy olib turibdi. 

Yaponiyadagi har qanday musobaqada medal olish juda mushkush. Medallar yaponlarning o'zidan deyarli ortmaydi. Bir paytlar Rishod Sobirov Kunchiqar yurtda jahon chempioni bo'lgan edi. Ikki yil avval Tokioda Davlat Bobonov Olimpiadaning bronza medalini qo'lga kiritgan.