Toshkent tumani beshincha bor karate WKF bo'yicha "Keles Open" xalqaro turniriga mezbonlik qildi

O'zbekiston Respublikasi sport vazirligi, Toshkent viloyati sport boshqarmasi, Toshkent tumani hokimligi, O'zbekiston karate WKF associaciyasi, Yoshlar ishlari agentligi Toshkent tumani bo'limi, Toshkent tumani sport maktabi kabi qator tashkilotlar "Keles Karate" sport klubi bilan hamkorlikda o'tkazilgan mazkur xalqaro turnir yuqori saviyada tashkil etildi. 

O'zbekiston Respublikasi Prezidentining 2023 yil 3 noyabrdagi PQ- 356 sonli "Karate (WKF) sport turini yanada rivojlantirish chora-tadbirlari to'g'risida"gi qarori ijrosini taminlash hamda iqtidorli sportchilarni saralash orqali terma jamoalarga munosib nomzodlarni aniqlash maqsadida tashkil etilgan mazkur musobaqada mamlakatimizning barcha hududlaridan hamda qo'shni Qozog'iston va Tojikiston davlatlardan 5 yoshdan 18 yoshgacha va 18 yoshdan katta bo'lgan 700 nafardan ziyod sportchilar g'oliblik uchun kurash olib borishdi.

Murosasiz va qizg'in bahslarga boy tarzda o'tgan beshinchi ananaviy turnirni "Keles Karate" sport klubi rahbari Dilshod Yusupov, musobaqa bosh kotibi Xurshid SHodibekov, bosh hakam Zokir Hayitmatovlar boshchiligidagi 30 nafar hakamlar guruhi boshqarib borishdi.

Ikki kun davom etgan murosasiz bellashuvlarning yakuniy natijalirga ko'ra, umumjamoa hisobida faxrli birinchi o'rinni Toshkent viloyati karatechilari qo'lga kiritdi. Ikkinchi o'rinni Qashqadaryo viloyati jamoasi egallagan bo'lsa, uchinchi o'rinlar Sirdaryo va xorazmliklarga nasib etdi.

Musobaqada barcha vazn toifalariga ko'ra g'olib va sovrindor bo'lgan diplom, medal va qimmatbaho esdalik sovg'alari bilan taqdirlanishdi. 

Ilhom RAHMONOV tayyorladi