Toshkentda badiiy gimnastika bo'yicha xalqaro musobaqa start oldi

O'zbekiston Milliy olimpiya qo'mitasi va Yoshlar ittifoqi sport markazi hamkorligida tashkil qilingan turnirda mamlakatimiz sportchilari bilan bir qatorda Rossiya, Singapur, Isroil, Hindiston, Qirg'iziston, Qozog'iston hamda Birlashgan Arab Amirliklari mamlakatlaridan gimnastikachilar ishtirok etishmoqda.

Bayram munosabati bilan poytaxtimizga badiiy gimnastika bo'yicha to'qqiz karra jahon chempioni, bugungi kunda Singapur terma jamoasida bosh murabbiy sifatida faoliyat olib borayotgan Byanka Panova, shuningdek, asli o'zbekistonlik xalqaro toifadagi sport ustasi, bugungi kunda Isroil terma jamoasi gimnastikachilariga ustozlik qilayotgan Venera Zaripovalar ham tashrif buyurganlar.

Bugun musobaqaning ochilish marosimi bo'lib o'tdi. Unda Milliy olimpiya qo'mitasi Bosh kotibi Jasur Matchanov, O'zbekiston Respublikasi Jismoniy tarbiya va sport vaziri o'rinbosari SHarifjon Mo'minjonov ham ishtirok etishdi va musobaqa ishtirokchilariga omad tilashdi.

SHuningdek, bugunning o'zida musobaqaning dastlabki g'olib va sovrindorlari nomi malum bo'ldi. Ertaga nihoyasiga etadigan xalqaro turnirga O'zbekiston gimnastika federaciyasining «Universal» sport majmuasi mezbonlik qilmoqda.