Toshkentda sinxron suzish bo'yicha jahon seriyasining so'nggi bosqichi start oldi

Yil boshidan ushbu musobaqalar Parij, Pekin, Tokio, Samorin, Budapesht, Madrid, Surraey, Los-Anjeles shaharlari hamda Siros orolida tashkil etildi. Navbatdagi bahslarga aynan Toshkent shahri mezbonlik qilmoqda.
Xalqaro suzish federaciyasi (FINA) talabiga ko'ra, sportchilar musobaqalarda ishtirok etib reyting ballarini to'plab borishadi va shunga ko'ra, mamlakat sportchilarining jahon reytingidagi o'rni aniqlanadi. O'zbekiston terma jamoasi jahon seriyasi bosqichlarida Pekin (Xitoy), Tokio (Yaponiya) va Siros oroli (Greciya) da bo'lib o'tgan bahslarda muvaffaqiyatli ishtirok etib kelishdi.

Toshkent shahrida o'tkaziladigan musobaqa shu yil hisobidan jahon seriyasidagi so'nggi bosqich bo'lib, unda Bolgariya, Meksika, Germaniya, Slovakiya, Qozog'iston va O'zbekiston sportchilari sovrinli o'rinlar uchun kurash olib boradilar. Bahslar 1 iyulga qadar Toshkent shahridagi “Saxovat sport servis” suzish havzasida bo'lib o'tadi.

Musobaqa yakunida sinxron suzish bo'yicha FINA jahon seriyalarida ishtirok etgan sportchilarning to'plagan reyting ballariga ko'ra kuchli uchlikka kirgan sportchilarga (mamlakatlar vakillariga) FINA mukofotlari taqdim etiladi.