Toshkentda tennis murabbiylari uchun xalqaro seminar yakunlandi

 “Olimpiya birdamligi” dasturi asosida Xalqaro tennis federaciyasi va O'zbekiston Milliy Olimpiya qo'mitasi hamkorligida tashkil etilgan tadbirda Qozog'iston, Qirg'iziston, Iroq davlatlari, shuningdek, mamlakatimizning turli hududlaridan tashrif buyurgan 16 nafar murabbiy o'z malakalarini yanada oshirishdi.

Darslar Respublika Olimpiya zaxiralari tennis maktabida tashkil etildi. Unda xalqaro federaciya tomonidan jalb etilgan ekspertlar Seydemir Borg'ei (Eron), Kraut Piter (Filpipin) va Igor SHelyakin (O'zbekiston) nazariy hamda amaliy darslarni o'tkazishdi. 

O'quv jarayoni yosh tennischilar bilan ishlashning zamonaviy metodikalari, ularning texnik qobilayatlarini oshirish, professional sportga tayyorlash kabi mavzularni o'z ichiga oldi.

Qayd etish joiz, Seydemir Borg'ei ikkinchi bor mamlakatimizda tashkil etilgan bunday dasturda ishtirok etdi. Eronlik mutaxassis bundan avval 2016 yil ham mana shunday seminarda qatnashgan. Tadbir yakunida darslarda muvaffaqiyatli ishtirok etgan murabbiylarga xalqaro federaciyaning maxsus sertifikatlari taqdim qilindi.