UFC Fight Night 232 turnirining barcha natijalari bitta sahifada + FOTO

"UFC Apex" arenasida o'tgan UFC Fight Night 232 oqshomining asosiy jangi o'rta vazn toifasida tashkil etildi. Unda reytingning 10-pog'onasida borayotgan amerikalik Brendan Allen o'zidan uch o'rin quyida joylashgan shotlandiyalik Pol Kreygni uchinchi raund yakunlanishiga 38 soniya qolgan bir paytda bo'g'ish usuli bilan mag'lubiyatga uchratdi. 

Ahamiyati jihatidan ikkinchi jangda mag'lubiyat nimaligini bilmay kelayotgan ekvadorlik yarim o'rta vazn toifasi vakili Maykl Morales avstraliyalik Jeyk Metyuzni hakamlarning yakdil qarori bilan mag'lubiyatga uchratdi. Bu uning UFC promoushenidagi to'rtinchi g'alabasi bo'ldi.

Biroz kutilmaganda rossiyalik o'rta vazn toifasi jangchisi Denis Tyulyulin britaniyalik Kristian Dankanga ikkinchi raundda texnik nokaut bilan yutqazib qo'ydi. Denis ushbu jangga oz fursat qolganida rozilik bergandi. 

Oqshomning asosiy kardidan o'rin olgan jangda qirg'izistonlik Miktibek Orolbay UFC promoushenida muvaffaqiyatli debyut qildi. Yarim o'rta vazn toifasi vakili bo'lgan Orolbay ikkinchi raundda amerikalik Urosh Medichni bo'g'ish usuli bilan taslim etdi.

SHuningdek, bugungi turnirda CHeyz Xuper, Peyton Talbott, Amanda Ribas, Joanderson Brito, Xose Jonson va Jeka Saragi o'z janglarini muddatidan avval qozonilgan g'alaba bilan yakunlashdi. 

Trey Ogden va Nikolas Motta o'rtasidagi jang hakamning xatosi tufayli o'tkazilmagan deb topildi. Referi Mayk Beltran uchburchak usuliga tushib qolgan braziliyalikning mag'lubiyatini ertaroq qayd etib, jangni to'xtatgan edi.