Urmia Open. Karatechilarimiz Erondagi musobaqada 3 ta medal qo'lga kiritishdi FOTOGALEREYA

Yoshlar va kattalar o'rtasida o'tkazilgan ushbu xalqaro musobaqada Azizbek Bo'riev murabbiyligidagi o'zbekistonlik karatechilar ham muvaffaqiyatli ishtirok etishdi. Hamyurtlarimiz Urmiyadagi turnirda jami 3 ta medalni qo'lga kiritishdi.

16-17 yoshlilar o'rtasidagi musobaqaning -55 kg vazn toifasidagi bellashuvlarida ishtirok etgan Ulug'bek Aliboev 6 ta jangda raqiblaridan ustun kelib, finalga yo'l oldi. Oltin medal uchun kechgan murosasiz bahsda esa omad mezbon sportchiga kulib boqdi.

-68 kg vazn toifasida yurtimiz sharafini himoya qilgan SHohruh Tursunmaxammatov ham 5 ta bellashuvni o'z foydasiga hal qilib, finalga yo'l oldi. Afsuski, bu safar ham eronlik karatechi finalda kuchli ekanini isbotladi. 

-76 kg vaznda qatnashgan Quvonch Muhammadiev final yo'llanmasi uchun kechgan uchrashuvda yutqazib qo'ydi. Lekin 3-o'rin uchun kechgan bahsda raqibini mag'lub etib, musobaqaning bronza medaliga ega chiqdi. 

Tan olish kerak, Eron nafaqat Markaziy Osiyoda, balki jahonda ham kuchlilar qatoriga kiradigan davlatlardan biri hisoblanadi. SHu bois, bu kabi turnirlarda ishtirok etish o'sib kelayotgan yosh sportchilarimiz uchun yaxshigina tajriba maktabi vazifasini o'tab beradi.