Xushxabar: Endi badiiy gimnastikachimiz o'smirlar Olimpiya o'yinlariga licenziya qo'lga kiritdi

O'smirlar Olimpiya o'yinlariga qizg'in tayyorgarlik ko'rayotgan gimnastikachilarimiz delegaciyamiz hisobiga yana bitta yo'llanma qo'shib qo'ydilar. Malayziyada badiiy gimnastika bo'yicha o'tkazilayotgan Osiyo chempionatida O'zbekiston terma jamoasi umumjamoa hisobida ikkinchi o'rinni egalladi va o'smirlar Olimpiya o'yinlari licenziyasini qo'lga kiritdi. Oktyabr oyida kim Argentinaga borishi esa O'zbekiston gimnastika federaciyasi o'tkazadigan saralashdan so'ng malum bo'ladi.

Ushbu muvaffaqiyat orqali O'zbekiston gimnastika federaciyasi hozirga qadar maksimal – 4ta licenziyani qo'lga kiritdi. Bungacha sport akrobatikasi (1ta) va sport gimnastikasi bo'yicha (2ta) yo'llanmalarga ega chiqilgani haqida xabar bergandik. Hali oldinda 17-21 may kunlari Filippinda bo'lib o'tadigan trampolin bo'yicha Osiyo chempionati kutib turibdi. Biz mazkur qita birinchiligida ham terma jamoamiz azolariga omad tilab qolamiz. O'z navbatida, muvaffaqiyat bilan O'zbekiston gimnastika federaciyasini tabriklaymiz.

Milliy olimpiya qo'mitasi shuni malum qiladiki, ayni paytda III yozgi o'smirlar Olimpiya o'yinlariga 17 nafar o'zbekistonlik sportchi 15 ta licenziya qo'lga kiritgan. (Akademik eshkak eshish va sport akrobatikasida 2 kishilik juftlikka bittadan licenziya berilgan.)

Demak, bugungi kun holatiga ko'ra O'zbekistonlik sportchilar III yozgi o'smirlar Olimpiya o'yinlariga qo'yidagi sport turlarida yo'llanmalarga ega bo'lib ulgurishdi:

Og'ir atletika – 3 ta
Baydarka va kanoeda eshkak eshish – 3 ta
Akademik eshkak eshish – 2 ta
Sport akrobatikasi – 1 ta
Sport gimnastikasi – 2 ta
Badiiy gimnastika – 1 ta
Ot sporti (konkur) – 1 ta
Taekvondo – 1 ta
Boks – 1 ta

O'smirlar Olimpiya o'yinlariga qadar bu ro'yxat hali kengayadi va nasib qilsa O'zbekiston sport delagaciyasi Buenos-Ayresga bundan ham katta tarkibda yo'l oladi.