17 apr 15:26
Yangiliklar

Suv sporti turlari

Yana ikki nafar suzuvchimiz Tokio-2020 normativini bajardi

Teglar : Suzish

Poytaxtimizda o'tkazilayotgan suzish bo'yicha O'zbekiston ochiq chempionati xushxabarlar bilan davom etmoqda.

Bugun kunning birinchi yarmida ikki nafar vakilimiz Olimpiada normativini bajarishga muvaffaq bo'ldi.

100 metrga batterflyay usulida suzish bo'yicha kechgan saralash bahslari yurtdoshlarimiz uchun omadli yakunlandi. Mazkur yo'nalishda Odilbek Yusupbaev hamda Eldor Usmonov Olimpiada normativini bajargan bo'lsa, Oybek Xo'jaev saralash talabiga mos natija qayd etdi.

Mazkur yo'nalishda Olimpiya normativi 51.96 soniyani tashkil etadi. Bu borada Yusupbaev 51.71 soniya, Usmonov esa 51.83 soniya natija qayd etishdi. 53.44 soniya natija qayd etgan Oybek Xo'jaevning natijasi saralash talabiga mos ko'rsatkich sifatida belgilangan.

Musobaqa doirasida MOQ raisi Rustam SHoabdurahmonov ushbu turnir orqali Tokio-2020 Olimpiadasi normativini bajargan suzuvchilarimiz bilan ko'rishdi. Eslatib o'tamiz, musobaqaning ilk kunida hamyurtimiz Aleksey Tarasenko 100 metrga erkin usulda suzish bahslarida Olimpiada normativini bajarib, Tokio-2020 Olimpiya o'yinlari sari katta qadam tashlagan edi. MOQ raisining bu safargi tashrifi avvalgilaridan farqli ravishda sportchilarimiz bilan o'tkazilgan muloqot bilan farq qildi.

Rustam SHoabdurahmonov Aleksey Tarasenko va boshqa sportchilarimiz bilan suhbatlashar ekan, ularga xalqaro musobaqalarda yurtimiz sharafini munosib himoya qilayotgani uchun o'z tashakkurlarini bildirib o'tdi. SHuningdek, Olimpiada normativini bajargani bilan suzuvchilarimizni tabrikladi. MOQ rahbari suhbat davomida Tokio-2020 Olimpiadasiga tayyorgarlik hukumatimiz tomonidan qo'llab-quvvatlanayotgani, MOQ hamda Turizm va sport vazirligi tomonidan barcha sharoitlar yaratib berilishini takidladi.

SHu tariqa Tokio-2020 Olimpiadasi normativini bajargan suzuvchilarimiz soni 5 nafarga etdi (Xurshid Tursunov, Vladislav Mustafin, Aleksey Tarasenko, Odilbek Yusupbaev, Eldor Usmonov) Taqqoslash uchun, Rio-2016 Olimpiadasida yurtimiz sharafini 2 nafar suzuvchimiz himoya qilgan edi.

Musobaqa bugun yakuniga etadi. Eslatib o'tamiz, unda Afg'oniston, Turkmaniston va Hindistondan kelgan suzuvchilar ham bahs olib borishmoqda.