Grand Prix Upper Austria турнирида 3 та медаль қўлга киритдик, бу сафар ҳам ёшлар ўзларини кўрсатишди

Уч кун давомида дунёнинг 52 мамлакатидан келган дзюдочилар медаллар ҳамда жаҳон рейтинги учун бериладиган қимматли очколар учун баҳс олиб боришди. Якунда Япония терма жамоаси медаллар жамғариш бўйича биринчи ўринни эгаллади. Дзюдо ватани вакиллари 2 та олтин, 4 та кумуш, 6 та бронза медали билан умумжамоа ҳисобида биринчи бўлишди. 

Пешқадам сингари 2 та олтин медаль қўлга киритган Грузия терма жамоаси кумуш медаллар камлиги ҳисобигагина иккинчи ўриндан жой олишди. Кучли учликка сафида икки чемпионга эга Италия терма жамоаси якун ясади. Словения, Франция, Германия, Бразилия, Украина, Куба, Қозоғистон ва Австралия терма жамоалари таркибида ҳам бир нафардан олтин медаль соҳиби борлигини инобатга олсак, турнир қай даражада муросасиз кечганлиги ойдинлашади.      

Ўзбекистон терма жамоаси эса Австрия Гран-присида 1 та кумуш, 2 та бронза медалига эга чиқди. Тошкент "Катта Дубулға" турнирида бўлгани сингари Линцда ҳам ёш дзюдочиларимиз ўзларини кўрсатишди. 18 ёшли Лазиза Ҳайдарова ҳамда 20 яшар Мардон Равшанов бронза медалини қўлга киритишди. Бу уларнинг катталар ўртасидаги мусобақалардаги биринчи медали эди. Муроджон Йўлдошев эса ўзи учун янги -81 кг вазнда кумуш медаль билан тақдирланди.