18 май 13:40
Янгиликлар

Теннис

19 йилда илк бор на Жокович ва на Надаль Рим "Мастерс" финалида ўйнамайди

Италия пойтахти Рим шаҳрида ўтказилаётган теннис бўйича "Мастерс" сериясига кирувчи турнир ўзининг ҳал қилувчи палласига кирди.

Хабар берганимиздек, дунёнинг биринчи ракеткаси Новак Жокович мусобақанинг 1/4 финалида даниялик Хольгер Рунега 2/6, 6/4, 2/6 ҳисобларида имкониятни бой бериб қўйганди. Айнан Новак Рим "Мастерс"нинг амалдаги чемпиони эди.

Шу тариқа, Италия пойтахтида янги чемпион аниқланади. Фаолиятини давом эттираётган теннисчилар орасидан Римда Жокович (олти марта чемпион), Рафаэль Надаль (10 марта чемпион, бу йил қатнашмади), Александр Зверев (бир марта чемпион, бу йил 1/8 финалда ютқазди) ва Энди Маррей (бир марта чемпион, 1-даврадаёқ ютқазди) камида бир марта чемпион бўла олган.

Таъкидлаш жоиз, қаторасига 18 йил давомида (2005 йилдан бери) финалгача юқорида номлари тилга олинган чемпионлардан ҳеч бўлмаганда бир нафари етиб келганди.