2026 йилда футбол клублари учун 560 млрд сўм ажратилади, Суперлига ва Пролига футболчилари даромад солиғидан озод этилади — Президент Қарори

2026 йилги мавсумдан бошлаб Суперлига футбол клублари тўғридан-тўғри давлат бюджетидан молиялаштирилади. Жорий йилда 16 та клуб учун 560 млрд сўм ажратилиши кўзда тутилган. Суперлигадаги ҳар бир футбол клуби учун 2026 йилда 35 миллиард сўмдан, 2027 йилда 30 миллиард сўмдан ва 2028 йилда 25 миллиард сўмдан берилади.

Қарорнинг асосий мақсадлари қуйидагилардан иборат:

- спорт соҳасини молиялаштиришнинг замонавий механизмларини жорий этиш ва муқобил манбаларни кенгайтириш;

- ажратилаётган маблағларни марказлаштириш, бюджет ҳажмини ошириш ва улардан самарали фойдаланишни таъминлаш;

- клубларда корпоратив бошқарувни жорий этиш, футболда молиялаштиришда босқичма-босқич тадбиркорлар улушини кенгайтириш, замонавий механизмларни жорий этиш ва клубларни бошқарувга олган тадбиркорларга имтиёзлар бериш.

Мазкур қарорга мувофиқ, Спорт вазирлиги ҳузурида Спорт соҳасида ташаббусларни қўллаб-қувватлаш жамғармаси ташкил этилади.

2026 йил 1 апрелдан:

- спорт федерация (уюшма)си фаолияти билан боғлиқ йиллик барча харажатларнинг камида 20 фоизи миқдорида ҳомийлик маблағи киритган тадбиркорни спорт федерация (уюшма)ларининг ижро органларига киритиш йўлга қўйилади;

- профессионал футбол клублари фаолияти билан боғлиқ бўлган йиллик барча харажатларнинг камида 20 фоизи миқдорида ҳомийлик маблағи киритган тадбиркор ёки тадбиркорлар гуруҳига профессионал футбол клубини ишончли бошқарувга бериш амалиёти жорий этилади.

2026 йил 1 апрелдан 2029 йил 1 апрелга қадар бўлган даврда Суперлига ва Пролигада иштирок этувчи футбол клублари футболчилари жисмоний шахслардан олинадиган даромад солиғини тўлашдан озод қилинади ҳамда улар учун ижтимоий солиқ ставкаси 1 фоиз миқдорида белгиланади.

Аввалроқ Championat.asia сайти Суперлиганинг ҳар бир клубига 35 миллиард сўмдан ажратилиши режалаштирилаётгани ҳақида хабар берган эди.