Оғир атлетика. Оғабек Нафасов жамоамизга Осиё чемпионатининг илк медалини тақдим этди

Мусобақанинг иккинчи куни кундузги дастурда супачага -55 кг вазн тоифасида ўзбекистонлик Оғабек Нафасов ҳам медаллар учун кураш олиб борди. 

Даст кўтариш машқида атлетимиз аввалига 104, кейин 108 кг тошни ўзига бўйсундириб, учинчи уринишда (111 кг) бироз омади чопмади. Аммо шунда ҳам спортчимиз иккинчи ўринни эгаллади. 

Учала имкониятидан унумли фойдаланган қозоғистонлик Чонтай Арли (115) биринчи бўлган бўлса, учликни унинг ҳамюрти Аблай Аулейханов (108 кг) якунлаб берди. 

Осиё Чемпионати

Эркаклар, -55 кг (даст кўтариш)

Олтин: Чонтай Арли - 115 кг; (Қозоғистон)

Кумуш: Оғабек Нафасов - 108 кг; (Ўзбекистон)

Бронза: Аблай Аулейханов (Қозоғистон)

Силтаб кўтариш машқида ҳам учинчи уриниши қовушмаган ҳамюртимиз 132 кг натижа билан кифояланди. Чонтай Арли яна тенгсиз (140), иккинчи ўрин учун курашда Аблай Аулейхановга 136 кг натижа етарли бўладигандек эди, лекин Шри-Ланка вакили Диланка Исуру Кумара охирги уринишда 137 кгни кўтариб, кумуш медални илиб кетди.