Қудратиллонинг вазнида бирлаштирувчи чемпионлик жанги бўлиб ўтди + ФОТО

Premier Boxing Champions оқшомининг марказий жанги ярим ўрта вазн ( 66,678 кг) тоифасида ўтказилиб, бирлаштирувчи чемпионлик жанги мақомида бўлди. WBC ва IBF йўналишлари чемпиони, америкалик Эррол Спенс (28-0, 22 KO) кубалик WBA Super камари соҳиби Йорденис Угас (27-5, 12 КО)га қарши рингга кўтарилди.

Ўн икки раундга мўлжалланган жанг муддатидан аввал якунланди. Эррол Спенс 10-раундда рақибини техник нокаутга учратиб, чемпионлик камарларини учтага етказиб олди. Ўша вазиятга келиб, Угаснинг ўнг кўзи кўрмай қолганди. Шифокор жароҳатни кўздан кечириб, рефери Лоуренс Коулга жангни тўхтатиш ҳақида тавсия берди. 

Шу тариқа, 32 ёшли Спенс ўз вазн тоифасидаги учта камарни ўз қўлида бирлаштирди. У бугун 2017 йилдан бери ўзида сақлаб келаётган IBF камарини олтинчи, 2019 йилда эга чиққан WBC камарини иккинчи бор ҳимоя қилди. 

Эррол мағлубият нималигини билмай келаётган кам сонли чемпионлардан бири бўлиб қолмоқда. Америкалик чарм қўлқоп устаси 28 та жангда ғалаба қозонган, ҳисобида 22 та нокаут бор. 

Маълумот учун, жанг тўхтатилгунига қадар Спенс 88:82, 88:82, 88:83 ҳисобларида ғалаба қозонаётган эди.