Денис Истомин 17 йиллик ҳукмронликдан сўнг "тахт"ни бўшатди

Истомин 2005 йилнинг 20 июнь куни эълон қилинган ҳафталик рейтингда собиқ теннисчимиз Фаррух Дўстовни ортда қолдириб, Ўзбекистоннинг биринчи ракеткасига айланган эди. Профессионал фаолиятини бошлаганидан кейин 1 йил ўтиб, биринчи рақамли теннисчига айланган Истомин ўшанда 19 ёш эди. Шундан буён тахтни ҳеч кимга бой бермаган Истомин янгиланган ҳафталик рейтингда Ҳумоюн Султоновни ўтказиб юборди. Султонов бу ҳафта ўз ўрнидан 12 поғона юқорилади ва мамлакатимизнинг биринчи ракеткаси айланди. Янгиланган АТР рейтингида Ҳумоюн Султонов 370-ўринда қайд этилган бўлса, Денис Истомин 373-поғонага жойлашган.

Айтиш керакки, ушбу йиллар давомида Денис Истомин ўзбек теннисини ўз елкасида "кўтариб" юрди. Бир неча йиллар давомида дунёнинг Топ-100 теннисчилари қаторида турди ва "Катта Дубулға" турнирларида юртимиз шарафини муносиб ҳимоя қилди. Афсуски, охирги 15 йилда Истоминдан бошқа теннисчиларимиз "катта" турнирларда умуман кўриниш бермади. Ёш теннисчиларимиз ҳозир ҳам "Фьючерс" ва "Челленжер" туркумига кирувчи турнирлардан нарига ўта олишмаяпти. 

Эслатиб ўтамиз, Денис Истоминнинг АТР рейтингидаги энг яхши натижаси 33-ўрин бўлган. У бу кўрсаткични 2012 йилда қайд этган эди.