Абдураимова ва Свитолина қатнашган турнирда россиялик 15 ёшли теннисчи чемпион бўлди

Россиялик 15 ёшли иқтидор эгаси мукофот жамғармаси 60 000 долларни ташкил этган турнирнинг финал учрашувида рейтингнинг 265-поғонасида борган швейцариялик Селин Нафдан устун келди - 1/6, 7/6(3), 6/0.

Эътиборлиси, Мирра иккинчи сетда учта сетболдан чиқиб кетишга муваффақ бўлди. Бу теннисчиларнинг ўзаро ўтказган илк учрашуви эди. Икки соату 2 дақиқа давом этган баҳсда Андреева 5, Селин эса 4 брейкка эришди. 

Маълумот учун, 15 ёшли Мирра Андреева фаолиятидаги бешинчи ITF турнири чемпионлигини қўлга киритди. У бугун эълон қилинган рейтингда 243-поғонага кўтарилиб олди. 17 ёшли Наф эса илк бор Топ-220 рейтингида дебют қилди.

Мирра 1/2 финал учрашувида турнирнинг биринчи ракеткаси, WTA рейтингида 104-поғонада борган россиялик ватандоши Надя Подорошкани 6/4, 6/0 ҳисобида мағлубиятга учратган эди. Айнан шу турнирда ҳамюртимиз Нигина Абдураимова ҳамда украиналик Элина Свитолина ҳам иштирок этганди.