Mubadala DC Open. Кудерметова дунёнинг 10-ракеткасига "жанг" таклиф қилди

Мамлакатимизнинг учинчи ракеткаси Полина Кудерметова нуфузли мусобақанинг саралаш баҳсларидаги икки ғалабаси эвазига асосий тўрга йўлланма олганди. Вакиламиз 1/16 финалда ҳам ажойиб ғалабани қўлга киритди. Полина дунёнинг 40-ракеткаси, испаниялик 28 ёшли Кристина Букша устидан иродали ғалабага эришди - 5/7, 7/6(4), 6/0. 

Нимчорак финалда эса теннисчимизни жиддий синов кутаётганди. Кудерметова дунёнинг ўнинчи, Вашингтон турнирининг иккинчи ракеткаси, украиналик тажрибали теннис маликаси Элина Свитолинага қарши кортга чиқди. Биринчи сет тай-брекда Элина фойдасига ҳал бўлди - 7/6(4). 

Дарвоқе, Полина биринчи сетда 5/3 ҳисобида олдинга чиқиб олган бўлса-да, бу устунликни ғалабага айлантира олмади. Бундан руҳланган Свитолина иккинчи сетда ҳам зафар қучди - 6/4. Бир соату 29 дақиқа давом этган баҳсда иккала теннисчи 4 тадан эйс зарбасини амалга оширди. Қўшхатолар ҳамюртимизда кўпроқ бўлди - 12 га 9. Бу теннисчиларнинг ўзаро ўтказган илк учрашуви эди. 

Таққослаш учун, Кудерметова айни пайтда WTA рейтингида 108, Элина Свитолина 10-ўринни эгаллаб турибди. Душанба куни эълон қилинадиган янги рейтингда Полина Топ-100`таликка кириб олиши мумкин.