11 окт 14:40
Янгиликлар

Бокс/ММА

Алекс Перейра оёғи синганини тасдиқлади ва қачон октагонга қайтишини айтди

Ярим оғир вазн тоифасида UFC чемпиони бразилиялик Алекс Перейра россиялик Магомед Анкалаевга қарши жангда оёғини синдириб олганини тасдиқлади.

"Рентген ва МРТ қилишди. Афсуски, оёғим синибди. Аммо тикланиш қанча вақт олишини ҳали билмайман. Менимча, Оқ уйдаги турнирга эътибор қаратиш керак, бу мени қизиқтиради. Ўйлайманки, шундай қиламан", - деди Перейра журналистларга.

Аввалроқ АҚШ президенти Дональд Трамп Оқ уйда АҚШнинг 250 йиллигига бағишланган UFC турнири 2026 йил 14 июнда бўлиб ўтишини маълум қилганди.

Эслатиб ўтамиз, 5 октябрь куни UFC 320 турнирида Перейра Анкалаевни биринчи раунддаёқ техник нокаутга учратиб, чемпионлик камарини қайтариб олганди. Унинг ҳисобида 13 та ғалаба ва учта мағлубият бор. Анкалаев эса 20 ғалаба, 2 мағлубият ва битта дуранг қайд этган. Яна битта жанги ўтказилмаган деб топилган.