Александр Усик - Тайсон Фьюри жанги санаси маълум

Бу ҳақда украиналик чемпионнинг менежери Эгис Климас хабар берди.

"Биз деярли келишиб олдик. Аслида бу ерда келишадиган нарсанинг ўзи қолмаганди. Мутлақ жаҳон чемпионлиги учун жангни ҳар икки томон ҳам хоҳлаяпти. Одамлар ҳам бу жангни истамоқда. Катта эҳтимол билан чемпионлик жанги 4 март куни Яқин Шарқда бўлиб ўтади. Жанг манзили учун асосий даъвогар Саудия Арабистони давлати бўлиб турибди. Шунингдек, Лондон ва Қатар варианти ҳам бор", - деди Климас Dailymail нашрига берган интервьюсида. 

Менежернинг сўзларига кўра, 4 март санасидан ташқари 18 февраль куни ҳам жанг учун захира варианти сифатида қаралмоқда.

Маълумот учун, Тайсон Фьюри шу ҳафта WBC камарини ҳамюрти Дерек Чисорадан ҳимоя қилганди. Жанг якунланганидан сўнг Фьюри WBA, WBO, IBF ва IBO чемпионлик камарлари соҳиби украиналик Александр Усикка "вызов" ташлаганди.