Алишер Алимов: "Ўзбекистонда самбонинг ривожида ОАВ ходимларининг ўрни беқиёс"

Шу муносабат билан бугун Ўзбекистон самбо ассоциацияси юртимизда ушбу спорт турини фаол тарзда ёритиб келаётган бир гуруҳ ОАВ ходимлари билан учрашув ташкил этди. Тадбирда Осиё самбо уюшмаси президенти Аламжон Муллаев ва Ўзбекистон самбо ассоциацияси раиси Алишер Алимов иштирок этди. 

Ассоциация раҳбари Алишер Алимов журналистларни касб байрами билан қутлар экан, ушбу спорт турининг ривожида ОАВнинг ўрни катта эканлиги ҳақида гапирди. 

"Барчангизни ушбу тадбиримизда кўриб турганимиздан мамнунмиз. Ўзбекистонда яқин йиллардан буён самбони ривожлантиришга алоҳида эътибор қаратилмоқда. Бунда Сизларнинг - Оммавий ахборот воситалари ходимларининг ўрни беқиёсдир. Шуни ишонч билан айта оламанки, ОАВ вакиллари юртимизда самбони оммалаштириш, уни янада ривожлантиришга ўз ҳиссасини қўшувчи бўғинлардан биридир. Сизларнинг меҳнатингиз сабаб амалга оширилаётган ишлар, ютуқларимиз халқимизга етиб боради. Фурсатдан фойдаланиб, барчангизни, сизлар орқали эса юртимиздаги бошқа ОАВ ходимларини касб байрами билан муборакбод этамиз. 

Барчангизга ижодий муваффақиятлар тилаб қоламиз", - деди Алишер Алимов.

Дўстона рухда кечган учрашувда ОАВ ходимларига дастурхон ёзилди ва самимий суҳбат қурилди. 

Тадбир якунида меҳмонлар учун эсдалик совғалари тақдим этилди.