Алишер Алимов: "Санкт-Петербургдаги мусобақа биз учун ҳар томонлама фойдали бўлади"

Баҳслар Россия Федерациясининг Санкт-Петербург шаҳрида ташкил этилади. Ушбу мусобақа олдидан Ўзбекистон самбо ассициацияси раиси Алишер Алимов ўз фикларини билдирди. 

"19 август куни терма жамоа аъзолари билан бирга Россияга йўл оламиз. Мусобақа 7 та вазн тоифасида ўтказилади ва унда 6 нафар ҳамюртимиз иштирок этади. 

Қайд этиш лозимки, мусобақада қатнашиш учун Халқаро самбо федерациясидан таклифнома келган. Улар бизнинг 6 нафар спортчимизни баҳсларда қатнашишга лойиқ кўришибди. Бу бизни хурсанд қилмасдан қолмайди. 

Беллашувларда 21 мамлакатдан спортчилар қатнашади. Яна бир муҳим жиҳати, турнир якунига кўра чемпион бўлган спортчилар 10 минг долларни қўлга киритишади. Кумуш ва бронза медали соҳиблари эса мос равишда 7 минг ва 5 минг долларга эга чиқишади. 

Яхши биласиз, ноябрь ойида Тошкент шаҳрида жаҳон чемпионати ўтказилади. Ушбу турнир орқали спортчиларимизнинг ҳолатини яна бир маротаба кўздан кечириб оламиз. Шунингдек, самбочиларимизнинг асосий рақибларини ҳам кўриб олиш имкониятимиз бўлади.

Шу каби жиҳатларни инобатга олган ҳолда айтишим мумкинки, Санкт-Петербургдаги мусобақа биз учун ҳар томонлама фойдали бўлади", - деди Алишер Алимов Ўзбекистон самбо ассоциацияси матбуот хизматига берган интервьюсида.