Амир Темур юртидан бўлган Камолиддин Расуловни табриклаймиз!

Камолиддин Расулов 1992 йил 20 июль куни полвонлар юрти - Қашқадарё вилояти Шахрисабз тумани Мўминобод қишлоғида курашчилар оиласида дунёга келган. Қашқадарё полвонлар диёри бўлгани учун болалигидан курашга меҳр қўйди. Бунда табииийки, оилавий муҳитнинг таъсири катта бўлди. Кичик Камолиддин отаси ва акасининг изидан бориб, курашга меҳр қўйди.

"Отам ва акамга қўшилиб тўй курашларига борардим. Акам Жамолиддин Расулов таниқли курашчи бўлган. Дадам Шахрисабздаги Илҳом ака Муродовнинг залига олиб борганлар. Шу кунгача эришган барча ютуқларим учун биринчи галда ота-онамга раҳмат айтаман", - дейди бугунги қаҳрамонимиз. 

Камолиддин спортдаги биринчи медалини Чироқчидаги турнирда қўлга киритган. -26 кг вазнда курашган ёш Расулов илк бор шохсупага кўтарилган эди. У ёшлигидан машҳур полвонлар, жаҳон чемпиони ва совриндорлари Баҳром Авазов, Фарҳод Тўраев, Камол Муродовга ҳавас қилган. Абдулла Тангриев, Ришод Собиров сингари дзюдочиларимиздан илҳомланган. Илҳом Муродов, Асадулло Бозоров, Ўзбекистонда хизмат кўрсатган мураббий Равшан Аҳмаджонов, терма жамоамизнинг ҳозирги мураббийи Иллиас Иллиадисдан кураш, самбо ва дзюдо сир-асрорларини ўрганди. Миллий кураш ва самбо спорт турларидан жаҳон чемпиони, Осиё ўйинлари ғолиби бўлган.

Камолиддин Расулов -81 килограмм вазн тоифасида юртимиз шарафини ҳимоя қилиб келмоқда. Дзюдочимиз "Катта Дубулға", Гран-При туркумига кирувчи нуфузли мусобақаларда муносиб тарзда иштирок этиб келмоқда. У ўтган йили Тошкент Гран-присининг кумуш медалини қўлга киритган. Айни пайтда -81 кг вазнда Токио Олимпиадасига йўлланма берувчи рейтингдан мустаҳкам ўрин эгаллаган.

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби, дзюдочилар номидан Камолиддин Расуловни бугунги шукрона куни билан муборакбод этамиз. Юзинг ёруғ, қўлинг ҳамиша баланд бўлсин, Камолиддин!