Ангренда уч минг нафардан зиёд аҳоли соғлом ҳаёт учун 5 000 қадам босиб ўтди

Ангрен шаҳрида «Соғлом ҳаёт учун 5000 қадам» шиори остида оммавий спорт тадбири ташкил этилди. Унда шаҳар ҳокимлиги, ИИБ, Миллий гвардия, ДХХ ходимлари, шаҳар жисмоний тарбия ва спорт бўлими, халқ таълими бўлими, Ангрен шаҳар болалар-ўсмирлар спорт мактаби, шунингдек ҳарбий қисм хизматчилари фаол иштирок этди. 

Умуман олганда, мазкур тадбирда уч минг нафардан зиёд кўнгиллилар қатнашди. Жисмоний ва маънавий соғломликнинг асоси бўлган бу каби тадбирлар аҳоли орасида соғлом турмуш тарзини кенг тарғиб қилишга қаратилганлиги билан аҳамиятлидир.

Лойиҳа доирасида «Миллий армиямиз – жасорат мактабидир!» шиори остида Тошкент ҳарбий округига қарашли ҳарбий қисм томонидан замонавий қурол-аслаҳа ва ҳарбий техника кўргазмалари ташкил этилди.

Миллий армиямизнинг жанговар техникалари билан бирга замонавий қурол-аслаҳалари ҳамда ҳарбий хизматчиларнинг қўл жанги бўйича машғулотлари ва кўргазмали чиқишлари намойиш этилди.

Байрамона руҳда ўтган марафон сўнгида Чирчиқ гарнизони маънавият ва маърифат марказига қарашли ашула ва рақс ансамбли томонидан ижро этилган куй-қўшиқлар барчани хушнуд этди.