Анталия "Катта Дубулға". Биргина Аҳадов қолди, қолганлар иштирокларини якунлашди

Афсуски, бугун курашга киришган 6 дзюдочимиздан фақат бир нафаригина медаль қўлга киритиш имкониятини сақлаб қолди. -73 кг вазндаги дзюдочимиз Шаҳрам Аҳадов 1/4 финалда озарбайжонлик Рашид Маммадалиевга ютқазиб қўйди. Энди у бронза медали йўлидаги ўтиш баҳсида таиландлик Масаюки Терадага қарши татамига чиқади. Бу вазндаги иккинчи дзюдочимиз Муроджон Йўлдошевга тақиқланган усул қўллагани учун мағлубият ёзилди.

Қолган дзюдочиларимиз эса саралаш баҳсларидаёқ иштирокларини якунлашди. -81 кг вазндаги Шарофиддин Болтабоев учинчи даврада амалдаги Олимпиада чемпиони, япониялик Таканори Нагасега шидо, яъни огоҳлантиришлар ҳисобига имкониятни бой берди. Ушбу вазндаги яна бир вакилимиз Нурбек Муртазоев ҳам учинчи босқичда канадалик Драпеудан енгилди. 

-70 кг вазн тоифасидаги тажрибали вакиламиз Гулноза Матниязова илк учрашувида португалиялик Таис Пинага, Шоҳиста Назарова венгриялик Сабина Гержакка ютқазиб қўйди.