Арман Царукян эҳтимолий рақиб ва жанг санасини эълон қилди

Ислам Махачев вакант қолдирган енгил вазндаги UFC камари учун Илия Топурия ва Чарльз Оливейр ўзаро жанг ўтказишади. Ғолиб вақтинчалик чемпионлик камари соҳибига айланади. Арман Царукяннинг айтишича, айнан шу турнир кардида унинг Жастин Гэтжига қарши жанги белгиланса, мантиқан тўғри бўлар экан.

"Ўйлашимча, рақибим Гэтжи бўлиши керак. Бу тўғри қарор бўлади. Оливейра вақтинчалик чемпионлик камари учун жанг қилади, Порье Холлоуэй билан BMF камари тақдирини ҳал этишга уриниб кўради. Гэтжида эса жанг йўқ. Халқаро жанглар ҳафтаси – мен Гэтжига қарши! Балки, жароҳат олган жангчиларнинг бирини алмаштирарман. Ташкилотчилар Дариуш - Мойкано жангини ҳам кардга киритишди. Аммо, асосий жангни ҳимоялаш учун мен каби катта номдаги жангчи керак", – деди Царукян.

Аввалроқ, Царукян Матеуш Гамротга қарши реванш жанги ўтказишдан бош тортганди. У айни пайтда грепплинг бўйича ўтказадиган жангига тайёргарлик кўрмоқда. Арман 31 май куни Москва шаҳрида ташкил этиладиган ADXC 10 турнирида собиқ Bellator чемпиони Патрики Фрейрега қарши беллашув ўтказади.