17 май 08:35
Янгиликлар

Бокс/ММА

Асадхўжа ғалаба қозонган турнирнинг асосий жанги Жалолов вазнида ўтказилиб, муддатидан аввал якунланди

Англиянинг Донкастер шаҳрида Queensberry Promotions компанияси томонидан навбатдаги профессионал бокс турнири ташкил этилди.

Оқшомнинг асосий жанги супероғир вазн тоифасида ўтказилиб, унда хорватиялик Филип Хргович британиялик таниқли боксчи Дэвид Алленга қарши рингга кўтарилди. Хргович жанг бошиданоқ ташаббусни қўлга олди ва рақиб устидан ўз устунлигини кўрсатди. Натижада учинчи раундда Алленнинг мураббийлари ҳакамдан жангни тўхтатишни сўради.

Шу тариқа, Хргович проф фаолиятидаги 20-ғалабасини тантана қилди. Муддатидан олдин қўлга киритган ғалабалари сони 15 тага етди. Ягона мағлубиятини Даниэль Дюбуадан қабул қилиб олган.

Ушбу жангдан олдин хорватиялик боксчи агар жангни тезроқ тугатса ва ҳеч қандай жароҳат олмаса, август ойи бошида ҳозирда рақиб қидираётган Мозес Итаумага қарши рингга чиқишга тайёр бўлишини айтган эди.