Асу Алмабаев Рамазон Темиров билан бир оқшомда октагонга чиқади, рақиб камар учун собиқ даъвогар!

У ҳамюртимиз Рамазон Темиров билан бир оқшомда октагонга чиқади. Асу 1 март куни АҚШнинг Невада штати Лас-Вегас шаҳрида ташкил этиладиган UFC Fight Night 253 турнирида австралиялик Стив Эрцегга қарши жанг ўтказади.

Маълумот учун, 30 ёшли Асу Алмабаев UFC промоушенида 4 та ғалабали серия билан келмоқда. Ўтган йилнинг октябрь ойида ҳакамларнинг якдил қарори билан Матеус Николауни мағлубиятга учратган эди. 29 яшар Стив Эрцег 2024 йилнинг майида чемпион Александр Пантожага очколар бўйича ютқазди. Август ойида эса Кай Кара-Франсга техник нокаут эвазига имкониятни бой берди.

Айни пайтда Асу Алмабаев UFC рейтингида саккизинчи, Стив Эрцег эса тўққизинчи ўринни эгаллаб турибди. Вегасдаги турнирнинг марказий жанги ўта енгил вазн (57 кг) тоифасида америкалик аралаш яккакураш устаси Брэндон Ройвал ҳамда португалиялик Манель Капе ўртасида бўлиб ўтади. 

Эслатиб ўтамиз, баҳорнинг илк куни ўтказиладиган ушбу турнирда ҳамюртимиз Рамазон Темиров ҳам октагонга кўтарилади. Унга UFC рейтингининг 15-поғонасини эгаллаб турган америкалик Чарльз Жонсон рақиблик қилади. 

Агар Асу ҳам, Рамазон ҳам ўз жангларида ғалаба қозонишса, яқин келажакда октагонда ўзаро тўқнаш келиб қолишлари мумкин. 

"Темиров ўзини жуда яхши кўрсатди. Нокаут эвазига ғалаба қозонди. Қардош халқимиз вакилига келажакдаги фаолиятида муваффақият тилайман. Вакт кўрсатади, ҳозирда ҳеч нарса дея олмайман: у билан жанг қиламанми ёки йўқ... UFC жанг берса - барчага қарши жанг қилаверамиз. Умуман олганда, унинг юқори чўққиларга чиқишига чин кўнгилдан тилакдошман", - деганди Асу "Зулфиқор" Алмабаев Рамазон Темиров ҳақида.