ATP рейтинги. Чемпион Жокович 7-ўринга тушиб кетди, Надаль эса кўтарилди

Эътиборга молик жиҳати шундаки, кеча "Уимблдон" чемпиони бўлган Новак Жокович 3-ўриндан 7-поғонага тушиб кетди. Лондондаги "Катта Дубулға" турнирида очколар ўйналмаганини, теннисчиларга фақат мукофот пуллари тақдим этилганини эътироф этиш ўринли бўлади. 

Аксинча, испаниялик Рафаэль Надаль дунёнинг учинчи ракеткасига айланиб олди. У икки ҳафта аввалги рейтингда 4-ўринда қайд этилганди. ATP рейтингини ҳамон Даниил Медведев бошқариб турибди. Медвелев Россия ва Беларусь теннисчиларига қўйилган тақиқ сабаб "Уимблдон"да иштирок этмади.   

Тажрибали теннисчимиз Денис Истомин қуйига шўнғишда давом этмоқда. У бугун янгиланган рейтингда 72 поғонага пастлаб, 453-ўринни эгаллаб турибди. Денис энди Ўзбекистоннинг учинчи ракеткаси. Биринчи ракеткамиз Ҳумоюн Султонов 3 поғонага юқорилаб, 394-ўринни банд этган. Сергей Фомин 408-поғонадан жой олган ва у энди иккинчи ракеткамиз. Топ-1000`таликдан яна бир теннисчимиз Санжар Файзиев (720) ўрин олган.    

ATP рейтинги. 11 июль кунги ҳолат

1. (1) Даниил Медведев (Россия) - 7775 очко

2. (2) Александр Зверев (Германия) - 6850

3. (4) Рафаэль Надаль (Испания) - 6165

4. (5) Стефанос Циципас (Греция) - 5150

5. (6) Каспер Рууд (Норвегия) - 5050

6. (7) Карлос Алькараз (Испания) - 4845

7. (3) Новак Жокович (Сербия) - 4770

8. (8) Андрей Рублёв (Россия) - 3700

9. (9) Феликс Оже (Канада) - 3445

10. (13) Янник Синнер (Италия) - 3185