23 янв 07:21
Янгиликлар

Теннис

Australian Open. Жоковични мағлуб этган Чон 1/4 финалга етиб келган биринчи кореялик бўлди

Мельбурн шаҳрида ўтказилаётган “Катта Дубулға” туркумига кирувчи Австралия Очиқ чемпионати ўзининг қизғин палласига кирди.

Яккалик баҳсларининг нимчорак финал учрашувида кореялик Хен Чон шов-шув сабабчисига айланди. Осиёлик ракетка устаси Australian Open мусобақасининг олти карра чемпиони сербиялик Новак Жоковични 7:6, 7:5, 7:6 ҳисобида мағлуб этди.

Бу билан Чон “Катта Дубулға” туркумига кирувчи мусобақаларда чорак финалга етиб келган биринчи кореялик теннисчига айланди. 21 ёшли Чон 2007 йилдан буён Рожер Федерер ва Марат Сафиндан кейин Австралия Очиқ чемпионатида Жоковични уч сетда мағлуб этган учинчи теннисчи бўлди.

Денис Истомин билан ўтказилган тўртта учрашувдан учтасида ғалабага эришган Хен Чон энди ярим финал чиптаси учун америкалик Теннис Сандгренга қарши кортга чиқади. Сандгрен ҳам мусобақа кашфиётига айланиб улгурди.