Азизбек Абдуғофуров: "Фёдорнинг акасини мағлуб этганман, энди навбат унинг ўзига"

Эътиборлиси, оқшомнинг марказий жанги ҳамюртимиз иштирокида бўлиб ўтади. Иккинчи ўрта вазн тоифасида собиқ WBC Silver камари соҳиби Азизбек Абдуғофуров россиялик тажрибали боксчи, собиқ жаҳон чемпиони Фёдор Чудиновга қарши рингга кўтарилади. Ушбу жанг 10 раунд этиб белгиланган.  

Кеча боксчилар матбуот анжуманида иштирок этишди ва журналистларни қизиқтирган барча саволларга жавоб беришди. 30 ёшли Абдуғофуров мазкур жангга 3,5 ой давомида тайёргарлик кўргани ва ғалабадан бошқа натижа ҳақида ўйламаётганини алоҳида таъкидлади.

"Мен ундан қўрқамайман. Мураббийим билан бирга Фёдорнинг ҳамма жангларини кўриб чиқдим. Машғулотларда астойдил ишладим. Бу жангга уч ярим ой тайёргарлик кўрдим. Фёдорнинг акаси Дмитрийга қарши Тошкентда жанг ўтказганман. Айни пайтда унинг укасини ҳам мағлуб этишга ҳам шайман. Фёдор қанчалик машҳур бўлмасин, ундан қўрқмайман. Лекин ҳурматини жойига қўяман. Москвага уни мағлуб этиш учун келганман. Ўзим ҳам, жамоам ҳам 29 апрель кунги жангга тайёр", — деди Абдуғофуров. 

Маълумот учун, Азизбек Абдуғофуров шу кунгача проф рингда 14 та жанг ўтказиб, 13 тасида ғалаба қозонган. Бешта жангни муддатидан аввал ўз фойдасига ҳал қилган. Ягона мағлубиятини ўтган йилнинг 20 март куни Москвада қабул қилиб олганди. Ўшанда у россиялик Павел Силягинга 108-120, 109-119, 109-119 ҳисобларида ютқазиб қўйганди. Силягин WBC Silver камарининг янги соҳибига айланган эди. 

Боксчимизнинг 29 апрель кунидаги рақиби Фёдор Чудинов ҳисобида эса 25 ғалаба, 2 мағлубият ва 1 дуранг бор. Ўн еттита жангда рақибларини нокаутга учратган. Фёдор охирги жангини 2021 йилнинг 15 октябрь куни Ронни Миттагга қарши ўтказиб, муддатидан аввал зафар қучган.