Азизжон Камилов Римда Италия спорти мутасаддилари билан учрашди

Камилов расмий мақомдаги ташриф чоғида Италия яккакураш спорт турлари (FILJKAM) ва дзюдо федерациялари президенти Доменико Фалькони, бош котиб Массимилиано Бенуччи, техник директор, япониялик Киёши Мураками, Италия кураш (ўзбек кураши) федерацияси президенти Витторио Жоржи ҳамда ушбу тадбир ташкилотчиси Ўзбекистоннинг Италиядаги фавқулотда ва мухтор элчиси Отабек Акбаров билан учрашди.   

Ишчан руҳда ўтган учрашув давомида қатор муҳим масалалар муҳокама қилинди. Улар орасида Ўзбекистон ва Италия дзюдо федерациялари ўртасида ҳамкорлик ўрнатиш, Тошкентда икки давлат асосий таркиб терма жамоаларининг қўшма йиғинини ўтказиш, спорт тиббиёти ва фармакология соҳасида биргаликда ишлаш, икки мамлакат мураббий ва ҳакамлари учун қўшма семинарлар ташкил этиш каби масалаларни алоҳида таъкидлаш ўринли бўлади. 

Шунингдек, Азизжон Камилов яккакураш спорт турлари учун база вазифасини ўтовчи Олимпия марказига ҳам ташриф буюрди. Барча шароитларга эга замонавий марказда Италиянинг олимпия оиласига мансуб яккакураш спорт турлари бўйича турли ёш тоифасидаги терма жамоалари машғулот ўтказади. 

Учрашув сўнггида Азизжон Камилов Италия дзюдо федерацияси президенти Доменико Фальконини Тошкентга таклиф қилди. Ўзбекона урф-одатларимизга кўра тўн кийдирилди. Таклифни хурсандчилик билан қабул қилган Фалькони тез орада Ўзбекистонга ташриф буюришга ваъда берди. Федерация раҳбарлари бир-бирларига тўрт йилликнинг энг нуфузли мусобақаси - Токио-2020 Олимпиадасида омад тилашди. 

Ўзбекистон дзюдо федерацияси мазкур учрашувни ташкил этишда амалий кўмак берган мамлакатимизнинг Италиядаги фавқулотда ва мухтор элчиси Отабек Акбаровга миннатдорчилик билдиради.

Ўзбекистон дзюдо федерацияси матбуот хизмати