Баҳодир Жалоловнинг проф боксдаги кейинги рақиби, жанг санаси ва манзили аниқ + ПОСТЕР

30 яшар ҳамюртимиз бизнинг вақт билан 27 июль тонгида АҚШнинг Нью-Йорк шаҳридаги "Мэдисон Сквер Гарден" аренасида ташкил этиладиган профессионал бокс оқшомида рингга кўтарилади.

Бу ҳақда Big Uzbek ҳамкорлик қилувчи Top Rank промоутерлик компанияси хабар берди. Оқшом доирасида Жалоловга италиялик Жанмарко Кардильо рақиблик қилади. Баҳодир Кардильонинг фаолиятидаги энг яхши рекордга эга рақибига айланади.

Жалолов ҳозирга қадар проф фаолияти давомида 15 та жанг ўтказиб, уларнинг барчасида рақибларидан устун келган. Ўзининг барча жангларини ватани бўлмиш Италияда ўтказиб келган Жанмарко Кардильо ҳисобида эса 12 та ғалаба, 1 та мағлубият ва 2 та дуранг мавжуд.

Баҳодир иштирок этадиган бокс оқшомининг иккинчи асосий беллашувида супер ярим ўрта вазн тоифасидаги ҳамюртимиз - Исроил Мадримовнинг эҳтимолий рақиблари Ксандер Заяс ва Хорхе Гарсия Перес вакант бўлиб турган WBO чемпионлик камари учун баҳс олиб боришади.

Марказий жанг эса ярим енгил вазн тоифасида WBC чемпионлик камари учун Брюс Каррингтон ва Матеус Гейта ўртасида кечади.