Бектемир бўлажак рақибининг кучли жиҳатлари ҳақида гапирди

Чарм қўлқоп устамиз афсонавий боксчи Оскар Де Ла Хойяга қарашли "Golden Boy" промоутерлик компанияси томонидан ташкил этиладиган оқшомда мексикалик Алан Кампага қарши рингга кўтарилади. Бектемир бўлажак рақиби ҳақида сайтимиз учун интервью берди.

"Мексикалик рақибим шу кунларда маълум бўлди. Ўзига яраша кучли боксчи эканлиги натижаларидан кўриниб турибди. Ҳаваскор бокслда ҳам 180 тага яқин жангларда иштирок этган экан. Бу борада у катта тажрибага эга эканлиги аниқ. Шундан келиб чиқиб, мураббийларимиз билан бирга бўлажак жангга тайёргарлик кўряпмиз. Камчиликлари ва устун жиҳатларини ўрганяпмиз. Мексикалик боксчилар чидамли бўлишади. Насиб қилса, роппа-роса бир ойдан сўнг ўтказиладиган жангда чиройли ғалабам билан юртдошларимизни хушнуд этишга астойдил ҳаракат қиламан", - деди Мелиқўзиев.

Маълумот учун, 28 ёшли Алан проф рингда 23 та жанг ўтказган бўлиб, уларнинг 17 тасида ғалаба қозонган. Бешта жангда мағлубият (2 та нокаут) аламини тотиб кўрган. Ўзи эса 11 та баҳсда рақибларини муддатидан аввал таслим этган. Сўнгги жангини 2019 йилнинг 2 май куни Эрик Базиниянга қарши ўтказиб, мағлубиятга учраган эди.