Бектемир Мелиқўзиевнинг рақиби ва жанг санаси маълум + ПОСТЕР

Хабарингиз бор, яқинда ҳамюртимиз АҚШга жўнаб кетган эди. Бектемир афсонавий боксчи Оскар Де Ла Хойяга қарашли "Golden Boy" промоутерлик компанияси билан шартнома имзолаган. Унинг 28 август кунига мўлжалланган жангини ҳам айнан "Golden Boy" ташкил этмоқда. Бу ҳақида ушбу промоутерлик компаниясининг расмий саҳифаларида хабар берилди ҳамда расмий постер ҳам тақдим этилди.   

Мелиқўзиев оқшомнинг асосий андеркарди доирасида рингга кўтарилади. Унинг рақиби мексикалик боксчи Алан Кампа бўлади. 28 ёшли Алан проф рингда 23 та жанг ўтказган бўлиб, уларнинг 17 тасида ғалаба қозонган. Бешта жангда мағлубият (2 та нокаут) аламини тотиб кўрган. Ўзи эса 11 та баҳсда рақибларини муддатидан аввал таслим этган. Сўнгги жангини 2019 йилнинг 2 май куни Эрик Базиниянга қарши ўтказиб, мағлубиятга учраган эди.  

Бектемир Мелиқўзиев эса фаолияти давомида 5 та жанг ўтказиб, барчасида зафар қучган. Тўртта жангда рақибларини муддатидан аввал енгган. Сўнгги жангини шу йилнинг 14 февраль куни Оскар Кортесга қарши ўтказиб, нокаут эвазига ғалаба қозонган эди. Чарм қўлқоп устамиз 28 август кунига белгиланган жангида ўзига тегишли бўлиб турган WBA Continental Americas чемпионлик камарини ҳимоя қилади.