Бектемирда “Соғлом ҳаёт учун 5 минг қадам” шиори остида тадбир ўтказилди

Аҳолининг бўш вақтини мазмунли ташкил этиш ва саломатлигини мустаҳкамлашда спорт машғулотлари, хусусан ҳаракатли машқларнинг ўрни беқиёс. Шу сабабли карантин талаблари юмшатилиши билан жисмоний тарбия ва спортни кенг тарғиб этишга қаратилган тадбирларга алоҳида эътибор қаратилмоқда.

Бугун Тошкент шаҳар Бектемир туманида ҳам “Соғлом ҳаёт учун 5 минг қадам” шиори остида оммавий юриш марафони ҳамда эрталабки бадантарбия машғулотлари ташкил этилди. Унда туманда истиқомат қилувчи қарийб 500 нафар аҳоли иштирок этди. Тадбирда Бектемир тумани ҳокими Жаҳонгир Иброҳимов ҳам қатнашиб, туман аҳолисини соғлом турмуш тарзига жалб этишга ўз ҳиссаларини қўшди.

Иштирокчилар Бектемир туман электр тармоқлари корхонаси олдидан стартга чиқиб болалар-ўсмирлар спорт мактаби стадионигача бўлган масофани пиёда босиб ўтишди. Барча иштирокчилар карантин қоидаларига тўлиқ риоя қилган ҳолда ҳаракатланди.

Оммавий юриш марафони якунида барча иштирокчилар туман болалар-ўсмирлар спорт мактабидаги футбол майдонида эрталабки бадантарбия машқларини бажаришди.

Таъкидлаш жоиз, пиёда юриш ва ҳаракатланиш саломатлик учун ниҳоятда фойдали бўлиб, бу каби тадбирлар аҳоли орасида соғлом турмуш тарзини кенг тарғиб этишга хизмат қилади.