Bellator 289. Иккинчи ярим финал тўлиқ давом этди, Кармуш камарини ҳимоя қилди ва бошқа натижалар

Оқшом доирасидаги Гран-прининг илк ярим финал жангида россиялик Магомед Магомедов (19-2-0) америкалик Патрик Микс (24-1-0)га қарши октагонга кўтарилди. Жангнинг иккинчи раундида Микс бўғиш усули билан Магомедовни мағлубиятга учратди.

Гран-прининг иккинчи ярим финал жангида енгил вазнда вақтинчалик Bellator чемпиони Рауфьон Стотс даъвогар Дэнни Сабателлога қарши октагонга чиқди. Беш раунд тўлиқ давом этган жангда чемпион очколар ҳисобига кўра ғалаба қозонди. Ҳакамлардан бири 50:45 ҳисобидаги ғалабани Дэнни Сабателлога тақдим этган. Қолган икки ҳакам эса бир хил 48-47 ҳисоблари билан чемпионнинг ғалабасини таъминлаган.  

Шу тариқа, Гран-прининг финалида Патрик Микс ва Рауфьон Стотс ўзаро тўқнаш келадиган бўлишди. Финалда ғолиб чиққан жангчи Bellator чемпионлик камари билан бирга 1 миллион доллар миқдоридаги мукофот пулини ҳам қўлга киритади. 

Бугунги оқшомнинг ко-мэйнивент жангида ўта енгил вазнда Bellator чемпиони Лиз Кармуш дивизионнинг собиқ чемпиони Жулиана Веласкесга қарши баҳс олиб борди. Иккинчи раундда Кармуш бразилиялик рақибасини мағлубиятга учратиб, камарини муваффақиятли ҳимоя қилди. 

Эътиборлиси, бундан етти ой олдин Лиз айнан Веласкесдан чемпионлик камарини тортиб олганди. Ўшанда тўртинчи раундда техник нокаут эвазига жанг тўхтатилганди. Жулиананинг мураббийлари бу қарорга эътироз билдиришган эди. Реваншда Кармуш яна бир бор кучли эканини исботлади.