“Беш ташаббус олимпиадаси” доирасида маҳалла ёшлари энди кураш бўйича ҳам беллашади

Дастлаб ўқув-семинар иштирокчилари учун “Кураш истиқболлари” ҳужжатли фильми намойиш этилди. Шундан сўнг тадбирни Спортни ривожлантириш вазирининг ўринбосари Абдулла Аслонов кириш сўзи билан очиб берди.

“Беш ташаббус олимпиадаси”нинг иккинчи мавсумидан бошлаб оммавий спорт мусобақалари дастурига миллий қадриятимиз бўлмиш кураш мусобақалари ҳам киритилди. Айни вақтда мусобақаларга тайёргарлик ишлари олиб борилмоқда”, - деди А.Аслонов ўз сўзида.

Тадбир доирасида Ўзбекистон кураш федерацияси раисининг биринчи ўринбосари Комилжон Юсупов курашнинг тарихи ва истиқболлари ҳақида маъруза қилди.

Спортни ривожлантириш вазирлиги бошқарма бошлиғи Шариф Мўминжонов эса “Беш ташаббус олимпиадаси” доирасида кураш бўйича “Бош Прокурор кубоги” мусобақаларининг ўтказилиш тартиби тўғрисида тушунтириш берди.

Эслатиб ўтамиз, “Беш ташаббус олимпиадаси”нинг иккинчи мавсуми доирасидаги танлов ва мусобақаларга аризаларни қабул қилиш жорий йилнинг 10 августидан 9 сентябрига қадар давом этиши режалаштирилган. 10 сентябрдан эса мусобақа ва танловларга старт берилади.

Алимурод МАМАДАМИНОВ, ўз мухбиримиз