“Бинокор” ёшлари халқаро турнир ғолиби!

Ўзбекистон Республикаси Жисмоний тарбия ва спорт вазирлиги ҳамда мамлакат хоккей федерацияси томонидан уюштирилган мазкур мусобақада Ўзбекистон, Латвия, Қозоғистон ва Қирғизистондан жами 5 жамоа иштирок этди.

Халқаро турнир ғолиблиги учун “Рига” (Латвия), “Қайсар” (Қозоғистон) ва “Олға” (Қирғизистон) жамоалари билан бирга мамлакатимизнинг “Бинокор” ва “Тошкент сити” клублари ёш хоккейчилари музга чиқишди.

Мусобақа Низомига кўра ғолибни аниқлаш учун давравий тизимда биринчи ва иккинчи ўринни эгаллаган жамоалар ўртасида ҳал қилувчи финал ўйини ўтказилиши белгиланган эди.

Икки кун давом этган давравий тизимдаги баҳслар якунида тўрт ўйинда тўртта ғалаба қайд этган Латвиянинг “Рига” жамоаси ёшлари ҳамда учта ўйинда ғолиб чиққан жамоамиз “Бинокор” финалда баҳс олиб боришди.

Ҳал қилувчи ўйинда меҳмонлар устида 1:0 ҳисобида ғалаба қозонган “Бинокор” ёшлари халқаро турнир бош совринини қўлга киритишди.

Яна бир жамоамиз “Тошкент сити” мусобақада учинчи ўринни эгаллаган бўлса, тўртинчи ва бешинчи ўринлар мос равишда “Қайсар” ва “Олға” жамоаларига насиб этди.

Кеча ушбу халқаро турнир ғолибларини тантанали тақдирлаш маросими бўлиб ўтди.

Унда Жисмоний тарбия ва спорт вазири ўринбосари Шарифжон Мўминжонов, Миллий олимпия қўмитаси Бош котиби Жасур Матчанов, Ўзбекистон хоккей федерацияси раиси ўринбосари Искандар Шодиев ва бошқалар иштирок этди.

Мусобақада иккинчи ўрин олган Латвиянинг “Рига” жамоаси мураббийларига зар тўнлар кийдирилди. Ғолиб ва совриндор бўлган ёшларга кубок ва медаллар топширилди.