Биринчи МДҲ ўйинларидаги натижамиз қандай бўлганди?

Эътиборга молик жиҳати шундаки, МДҲ ўйинлари бир вақтнинг ўзида Беларуснинг 11 шаҳри - Минкс, Брест, Витебск, Гомель, Гродно, Могилев, Борисов, Солигорск, Молодечно, Орша ва Жлобинда ташкил этиляпти. Ўз тарихида иккинчи бор ўтказилаётган мусобақада 22 давлатдан жами 2200 нафар спортчи медаллар йўлида баҳсларга киришган. Улар орасида Ўзбекистон терма жамоасининг 326 нафар спортчиси юртимиз шарафини ҳимоя қилади.

Қизиқ ҳолат, мусобақанинг ўз сарҳадларидан чиқиб, географияси яхшигина кенгайганига гувоҳ бўлишимиз мумкин. МДҲга аъзо мамлакатлардан ташқари Буюк Британия, Венесуэла, Вьетнам, Ўмон, Қувайт, Малайзия, Баҳрайн, Мўғулистон, Покистон, БАА, Ливан, Куба, Эрон ва Миср спорт делегациялари Беларусь мезбонлик қилаётган Ўйинларда иштирок этади.     

Таққослайдиган бўлсак, 2021 йилнинг 4-11 сентябрь кунлари Қозон шаҳрида бўлиб ўтган МДҲ ўйинларида Озарбайжон, Арманистон, Беларусь, Қозоғистон, Қирғизистон, Молдова, Россия, Тожикистон ва Ўзбекистондан 1000 нафардан ортиқ спортчи иштирок этган эди. Ўшанда иштирокчилар спортнинг 16 тури бўйича 181 та медаллар жамланмаси учун ўзаро мусобақалашганди. Спортчиларнинг ёши 14дан 23гача бўлиши қатъий белгилаб қўйилган эди.

Биринчи МДҲ ўйинларида Ўзбекистон делегацияси таркибидаги спортчилар 168 нафарни ташкил қилиб, вакилларимиз 18 та спорт турида баҳсларда иштирок этишганди. Якунда Ўзбекистон терма жамоаси 91 та (23 та олтин, 32 та кумуш, 36 та бронза) медаль билан умумжамоа ҳисобида Россиядан сўнг иккинчи ўринни банд этганди. 

Медаллар жамланмаси бўйича тўлиқ рейтинг эса қуйидагича кўриниш олганди: