Бироздан сўнг Абдураимова иштирокидаги учрашув бошланади

Мукофот жамғармаси 100 000 АҚШ долларини ташкил этувчи ушбу турнирда ҳамюртимиз Нигина Абдураимова ҳам муваффақиятли старт олган эди. Мамлакатимизнинг биринчи ракеткаси илк даврада германиялик тажрибали теннисчи Сабин Лисицки 6/3, 6/4 ҳисобида мағлубиятга учратганди. Сабин фаолияти давомида икки бор (бири яккаликда, иккинчиси жуфтликда) "Катта Дубулға" туркумига кирувчи Уимблдон турнири вице-чемпионига айланган, 8 та WTA турнирида бош совринни қўлга киритган эди. 

Бироздан сўнг Нигина 1/8 финал босқич учрашувида россиялик Екатерина Макаровага қарши кортга чиқади. Ушбу баҳс бизнинг вақт билан соат 11:30да бошланади. Катя биринчи даврада болгариялик Гергана Топалова (рейтингдаги ўрни 243)дан 6/0, 7/6(4) ҳисобида устун келганди.

Таққослаш учун, Абдураимова WTA рейтингида 245, Макарова эса 188-ўринни эгаллаб турибди. Бу теннисчиларнинг ўзаро ўтказадиган иккинчи учрашуви бўлади. Нигина ўтган йилнинг 22 июнь куни Берлинда ўтказилган баҳсда Екатерина Макаровани уч сет натижасига кўра мағлубиятга учратган эди.