Бобоусмон рингга чиққан оқшомнинг марказий жанги тўлиқ давом этди

RCC промоутерлик компанияси томонидан ташкил этилган оқшомнинг марказий жанги биринчи ўрта (69,9 кг.гача) вазн тоифасида россиялик Магомед Курбанов (23-0, 13 KO) ҳамда венесуэлалик Хоан Гонсалес (31-1, 31 KO) ўртасида ўтказилди.

Ўн раундга мўлжалланган жанг тўлиқ давом этди ва ғолиб ҳакамлар қарорига кўра эълон қилинди. Якунда ҳакамларнинг якдил қарори (97-93, 97-93, 97-93) билан Магомед Курбанов ғалаба қозонди ва мағлубиятсиз сериясини давом эттирди.

Эслатиб ўтамиз, ушбу бокс оқшомининг илк жангида ўзбекистонлик 28 ёшли боксчи, ҳаваскорлар ўртасида Осиё чемпиони (2019, 2021), жаҳон чемпионатининг бронза медали соҳиби (2019) Бобоусмон Батуров россиялик Артём Пугач (1-2-2)ни очколар ҳисобига кўра мағлубиятга учратган эди.