Бобур Қурбонов Нурсултон Рўзибоевни мағлуб этгани ҳақида гапирди

Ўзбекистонлик аралаш яккакураш устаси Бобур Қурбонов Olamsport.com сайтига берган интервьюсида UFC'га ўтиши кутилаётган Нурсултон Рўзибоев ҳақида фикр билдирди.

— Универсал жангда Нурсултон Рўзибоев билан жанг қилган экансиз?

— Ўша пайтда ҳарбий хизматда, пахта теримида эдим. Деярли икки ой пахта йиғим-теримида бўлдик. Келдим, бир ҳафта ҳарбий қисмда бўлдик. Кейин Чирчиққа мусобақага олиб кетишди. Биринчи жангда Нурсултон билан тўғри келиб қолдим, лекин ўша пайтда Нурсултонни танимас эдим. Билсам, оддий фуқароликдаги бола экан, шу ҳолида ҳарбийлар ўртасидаги мусобақага қўйилган, машғулот қилиб юрган бола экан. Нурсултонни ютдим, лекин қўлимни жароҳатлашди. Афсуски, ўша жангдан кейин ярим финалга чиқишим керак эди, аммо... Нурсултон келиб: Ака, сизни ҳурмат қиламан, сизни танийман деганди. Ҳурмати яхши экан. Аллоҳ тақдир қилган экан, ўшанда очколар ҳисобига ғалаба қозонганман.

— Ҳозир Нурсултон Рўзибоев билан муносабатингиз қандай?

— Муносабатимиз яхши, салом-алигимиз бор. Айтганимдек, кибрга берилмаган, ҳурматни жойига қўядиган йигит. Кўп ММА жангларида бирга бўлганмиз. Иродали бола, бир марта кўзимни ёнида мағлуб бўлган эди. Ўшанда жуда тушкунликка тушиб қолганди. Мен ўша пайтда спортни ташлаб кетса керак деб ўйлаган эдим. Йўқ, мана яна ўзини тиклаб олди. Ҳозир Ўзбекистонда уни кимсан Нурсултон Рўзибоев деб билишади.