Богдан Гусков: "Волкан аввалгидек вулқон эмас, мен эса очман!"

"Охирги жангим Миср давлатида Карлос Эдуардога қарши бўлиб ўтганди. Карлос Бразилияда афсона ҳисобланади. Ўша жангда номдор рақибимни 25 сонияда мағлубиятга учратдим. Шу жангдан кейин мени пайқаб қолишди деб ўйлайман. Кейин менежеримлар UFC`даги инсонлар билан музокара олиб боришди. Улар карддагилардан бири сафдан чиқса, мени қўшиб юборишларини айтишди. Шундан сўнг дунёнинг кучли лигасида жанг қилиш учун умид пайдо бўлди. Бу ерда катта менежерлик саъй-ҳаракатлари бор. Чунки мендан бошқа кардни тўлдирадиган йигитлар жуда кўп эди.

 Азамат Мурзаканов билан жуда яқин эмасмиз. Шунчаки салом-алик билан чекланамиз. У билан нима бўлганини билмайман. Унинг ўрнига Оздемирга қарши жанг қилаётганимдан хурсандман. Энг муҳим жиҳати шундаки, ҳаммага ҳам бундай имконият тақдим этилавермайди. Дебют жангдаёқ рейтингда 9-ўринни эгаллаб турган номдор рақибга қарши октагонга чиқиш ҳаммага ҳам эмас. Ғалаба қозонган тақдиримда Топ-10`таликка кириб олиш имконияти юзага келади. Бошқа томондан бу катта таваккал. Буни ҳам яхши билиб турибман. Ютсам, совғаси жуда ҳам қимматли бўлади. 

Рақибни жиддий тарзда ўрганяпмиз. Волкан учун бу одатдагидек офисдаги кун бўлади. Мен учун эса катта синов. Мен рақибимдан анча ёш ва ғалабага чанқоқ ҳамда очман. У дивизионнинг кучли жангчилари билан тўқнаш келган. Икки вазнда собиқ UFC чемпиони Даниэль Кормье билан камар учун жанг ўтказган. Лекин менинг ўйинимга ўйнайдиган бўлса, у аниқ ютқазади. Волкан охирги жангларида россиялик мен билган йигитлар Магомед Анкалаев ва Никита Криловга ютқазган. У Кормье билан жанг қилган пайтдаги Оздемир эмас. Волкан аввалгидаек "вулкан" эмас (кулади). Оздемир кикбоксчи ва мен каби асосан тик ҳолатда жанг ўтказади. 

Кўрамиз, 2 сентябрь куни барча саволларга жавоб оламиз. Ўзимдан талаб қилинган барчасини амалга оширдим, тайёргарлик кўнгилдагидек ўтди. Фақат октагонга чиқиб, ана шу тайёргарликни амалда кўрсатиш қолди, холос", - деди сайтимизга берган интервьюсида Гусков.

Olamsport.com сайтининг UFC жангчиси Богдан Гусков билан интервюсини томоша қилинг