Бокс. “Рио-2016” ўйинларининг яна 39та йўлланмаси ўйналди

Мазкур мусобақада 92 давлатдан келган 375 нафар чарм қўлқоп устаси 39та лицензия учун баҳс юритди.

Қизғин кечган баҳсларнинг якунларига кўра Олимпиада ўйинларининг йўлланмаларига -91 ҳамда +91 кг. вазн тоифаларида олтин медаль соҳиблари, -49 кг. вазнда финалчилар, -52 кг.дан -81 кг.гача вазн тоифаларида ярим финалга қадар етиб келган боксчилар сазовор бўлдилар. Ушбу вазн тоифаларида, шунингдек, рақиби якунда ғолибликка эришган чорак финалчилар ҳам “Рио-2016” ўйинларида қатнашиш ҳуқуқига эга бўлишган.

Мазкур саралаш турнирида Куба, АҚШ, Буюк Британия, Франция, Хитой, Озарбайжон, Беларусь, Россия, Украина, Ирландия, Венгрия, Хитой Тайпейи, Гаити, Ироқ, Тожикистон, Туркманистон, Туркия, Болгария, Мўғилистон, Ҳиндистон, Молдова, Япония ва Италия давлатлари вакиллари йўлланмаларга эга бўлдилар.

Эслатиб ўтамиз, Ўзбекистон эркаклар терма жамоаси XXXI ёзги Олимпия ўйинларининг бокс мусобақаларига барча вазн тоифасида йўлланмаларни нақд қилиб қўйган.