Боксчилар Навоийни ёд этишди

Бокс бўйича Ўзбекистон миллий терма жамоа аъзолари ҳам ушбу қутлуғ санани муносиб қаршилашди.

Шу муносабат билан кеча Тошкент вилоятидаги “Янгиобод” ўқув-машғулот базасида жорий йил Япониянинг Токио шаҳрида бўлиб ўтадиган ёзги Олимпия ўйинларига тайёргарлик машғулотларини олиб бораётган миллий терма жамоа спортчилари, мураббийлари иштирокида ушбу сана муносабати билан тадбир ташкил этилди. 

Унда Ўзбекистон бокс федерацияси бош котиби Муроджон Мамадалиев спортчиларнинг халқаро спорт майдонларида Ватан шаънини муносиб ҳимоя қилишида, юксак ғалабаларга эришишида нафақат жисмоний куч-қудрат, балки чуқур билим, интеллектуал салоҳият, тарих ва адабиётни теран идрок этиш катта аҳамиятга эга эканлигини таъкидлаб, сўз мулкининг султони Алишер Навоий асарларини ўқиб-ўрганиш кишини камолотга етаклашини қайд этди. 

Федерациянинг терма жамоалар ва ҳудидий бўлимлар билан ишлаш бўлими мутахассиси Тўлқин Рўзиев эса ўз чиқишида Навоий қаламига мансуб ғазаллар, асарлар ҳақида йиғилганларга маълумот бериб ўтди.

Миллий терма жамоа бош мураббийи Марат Қурбонов, мураббийлар Тўлқин Қиличев, Рахматжон Рўзиохунов, Абдувоҳид Жалолов, спортчилар Баҳодир Жалолов, Бобоусмон Батуров, Асадхўжа Мўйдинхўжаев ва бошқалар тадбир давомида хазрат Навоийнинг ғазалларидан парчалар ўқиб беришди.

Ўзбекистон бокс федерацияси матбуот хизмати