Боксчиларимиз "Елорда кубоги"даги иштирокларидан қанча ишлаб олишди?

Ушбу нуфузли мусобақада Ўзбекистон терма жамоаси 3 та олтин, 1 та кумуш ва 3 та бронза медалини қўлга киритишганди. Эркаклар ва аёллар ўртасидаги халқаро турнир ғолиблари 700 АҚШ долларига эга бўлишди. Кумуш медаль соҳиблари — 400, бронза медалини қўлга киритган боксчилар 200 долларлик бўлишди.

Чарм қўлқоп усталаримиздан Дилшод Абдумуродов (-60 кг), Ҳавасбек Асадуллаев (-71 кг) ва Жаҳонгир Зокиров (+92 кг) олтин, Жасурбек Йўлдошев (-80 кг) кумуш, Асилбек Жалилов (51 кг), Тўрабек Хабибуллаев (-80 кг) ҳамда Нусратбек Тоҳиров (-92 кг) бронза медалига сазовор бўлди.

Шу тариқа, Ўзбекистон терма жамоаси боксчилари Астанадаги халқаро турнирдан умумий ҳисобда 3100 АҚШ доллари ишлаб олишди. Мусобақада ҳам эркаклар, ҳам аёллар терма жамоаси билан иштирок этган Қозоғистон терма жамоаси эса 11 200 доллар миқдоридаги мукофот пулини қўлга киритди.