Боксчимиз Шаҳрам Ғиёсов Олимпиададаги шиорини ошкор қилди

Бу ҳақида “Фейсбук” ижтимоий тармоғида Uzbek Boksi Fanatlari хабар бермоқда. -69 кг вазн тоифасидаги боксчимиз илк маротаба Олимпиадада иштирок этади.

Савол: Шиорингиз?

Жавоб: Ўзбекистон келажаги буюк давлат (Ислом Каримов)!

Савол: Рио Олимпиадасида сиз учун энг муҳими?

Жавоб: Энг муҳими, авалламбор, ғалаба қозониш ва Ўзбекистон байроғини баланд кўтариш. Жамоамизнинг умумжамоа ҳисобида биринчи ўринни қўлга киритишига хиссамни қўшиш.

Савол: Олимпия ўйинлари сизнинг тасаввурингизда...?

Жавоб: Олимпиадани тасаввур қилишим жудаям қийин. Боиси, бу мени биринчи олимпиадам. Энг катта ва нуфузли мусобоқам. Мен чин юракдан жудаям хурсандман. Ўйлайманки, бу мен кутган Олимпиада! 

Савол: Симферополдаги халқаро турнир сизнинг фаолиятингизда алоҳида аҳамиятга эга экан. Нима учун?

Жавоб: Боиси, мен айнан мана шу мусобақадаги муваффақиятли иштирокдан сўнг халқаро тоифадаги спорт устаси унвонини қўлга киритганман. 

Савол: Мағлубиятга учрашдан қўрқасизми? 

Жавоб: Нафақат боксда, балки бошқа спорт турларида ҳам мағлубиятга учрашдан қўрқмайдиган спортчининг ўзи бўлмаса керак. Лекин баъзи ҳолларда бу нарса фойдага ишлаши ҳам мумкин. 

Савол: Вазнингизни ўзгартирганингиздан афсусланмайсизми?

Жавоб: Асло. Аксинча, бу менга фойда бўлди. Айнан янги вазн тоифасида мен тўрт йилликнинг энг нуфузли мусобақасида илк бор иштирок этиш ҳуқуқини қўлга киритдим. 

Савол: Кўпчилик спортчилар тушкун ҳолатга тушиб қолганларида, спортдан кетмоқчи эканликларини айтишади. Сизда ҳам шундай ҳолат юз берганми?

Жавоб: Ҳа, бундай ҳолат бўлган. Лекин ўз вақтида ўзимни қўлга олиб, олға қадам ташлаганман.