Боксчимиз WBC камари учун қозоғистонлик рақибига қарши рингга чиқади + ПОСТЕР

Чарм қўлқоп устамиз Абдурасул Исмоилов (11-3-1, 7 КО) қозоғистонлик боксчи Дулат Бекбауов (2-0-0, 2 КО)га қарши WBC Greater Turan минтақавий камари учун чемпионлик жангини ўтказади. Ушбу жанг 28 март куни Қозоғистоннинг Тараз шаҳрида бўлиб ўтади.

"Дулат Бекбауов - Абдурасул Исмоилов — WBC Greater Turan Title камари учун. Қозоғистон ва Ўзбекистон боксчилари ўртасида WBC камари учун 10 раундлик жанг бўлиб ўтади. Сизни чиндан ҳам афсонавий камарга лойиқ жанг кутмоқда", - дейилади промоушеннинг Инстаграмдаги расмий саҳифасида.

Бекбауовнинг ҳаваскорлар ўртасидаги энг юқори натижаси 2023 йилда Тошкентда бўлиб ўтган жаҳон чемпионатининг кумуш медали бўлган. Шунингдек, у икки карра (2022, 2024) Осиё вице-чемпиони ҳисобланади. Қозоғистонлик профессионал дебютини 2025 йил июль ойида ўтказган ва ўша йилнинг декабрь ойида Олмаотада ҳамюртимиз Ҳасанбой Мирзаҳамроевни учинчи раундда нокаутга учратганди.

Абдурасул Исмоилов Россия, Вьетнам, Корея Республикаси, Хитой каби давлатларда фаол тарзда ўз жангларини ўтказиб келяпти. Унинг сўнгги жанги 2025 йил февраль ойида Москвада WBA Asia камари учун бўлиб ўтган. Россиялик Артур Субханкуловга қарши кечган баҳс тўлиқ давом этган ва унда боксчимиз ҳакамларнинг якдил қарори билан имкониятни бой берганди.