Бўлажак рақибимиз Қувайтнинг шашти баланд

Дастлабки учрашувда ҳамюртларимиз Қувайт термаси билан куч синашади. Қувайт қишки ўйинлар ассоциацияси президенти Фаҳид Ал-Ажми Арманистонда бўлиб ўтадиган жаҳон чемпионатида ҳамюртлари умидли ўйин кўрсатишига ишонч билдирмоқда .

Латвиялик мураббий Андрис Барткевич бошчилигидаги терма жамоа дастлаб ўз юртида йиғин ўтказди, апрель ойи бошида Ереванда ўтадиган жаҳон чемпионати олдидан эса Болгарияда шуғулланишлари кўзда тутилган.

Узоқ йиллар Германияда ишлаган латвиялик мутахассис Андрис Барткевич шу йил қишда Хитойда бўлиб ўтган Осиё ўйинлари олдидан Қувайт терма жамоасига бош мураббий этиб тайинланганди.

- Кескин курашда фақат Қирғизистон термасидан енгилдик. Рақибимиз жаҳон чемпионатлари таснифида биздан икки дивизион юқори эканини инобатга олинса, ёмон натижа кўрсатмадик. Осиё ўйинларидаги тажриба бизга жаҳон чемпионатида қўл келади, - деди Фаҳид Ал-Ҳажми. 

Маълумот ўрнида, Осиё ўйинларида Қувайт қўшимча вақтда (овертаймда) 8-9 ҳисобида қирғизистонликлардан мағлубиятга учраган бўлса, сўнгра Сингапур (10-3), Баҳрайн (34-0) ва Туркманистон (8-4) устидан зафар қучди.

Эслатиб ўтамиз, IIHF тасарруфидаги жаҳон чемпионати IV дивизион ўйинлари Арманистон пойтахти Ереван шаҳрида ўтказилади.

Мирзаҳаким Тўхтамирзаев